ಸುಳ್ಯದ ಪತ್ರಕರ್ತ ಹಸೈನಾರ್ ಜಯನಗರ ಅವರ ಸಹೋದರ ಕೊಡಗು ಜಿಲ್ಲೆಯ ಮಾದಾಪುರ ನಿವಾಸಿಗಳಾದ ನಜೀರ್ ಹಾಜಿ ಮತ್ತು ರಹ್ಮತ್ ದಂಪತಿಗಳ ಪುತ್ರ ರಿಯಾಜ್ ನಜೀರ್
ಪ್ರತಿಭೆಗೆ ಗಡಿಗಳಿಲ್ಲ, ಪರಿಶ್ರಮಕ್ಕೆ ಪರಿಮಿತಿಗಳಿಲ್ಲ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿರುವ ಹೆಮ್ಮೆಯ ಕನ್ನಡಿಗನೊಬ್ಬ ಇಂದು ಜಾಗತಿಕ ವೇದಿಕೆಯಲ್ಲಿ ತನ್ನದೇ ಆದ ಛಾಪು ಮೂಡಿಸಿದ್ದಾರೆ. ಕನಸುಗಳನ್ನು ಗುರಿಯಾಗಿಸಿಕೊಂಡು, ಗುರಿಗಳನ್ನು ಸಾಧನೆಯಾಗಿ ಪರಿವರ್ತಿಸುವ ದೃಢಸಂಕಲ್ಪದ ಪ್ರತೀಕವಾಗಿ ಹೊರಹೊಮ್ಮಿರುವ ಕೊಡಗು ಜಿಲ್ಲೆಯ ಮಾದಾಪುರದ ರಿಯಾಜ್ ನಜೀರ್ ಅವರು, ಯುನೈಟೆಡ್ ಅರಬ್ ಎಮಿರೇಟ್ಸ್ನ ಮಹತ್ವಾಕಾಂಕ್ಷೆಯ ರಾಷ್ಟ್ರೀಯ ರೈಲು ಜಾಲವಾದ ‘ಎತಿಹಾದ್ ರೈಲು’ ಯೋಜನೆಯ ಚೊಚ್ಚಲ ಪ್ರಯಾಣವನ್ನು ಯಶಸ್ವಿಯಾಗಿ ಮುನ್ನಡೆಸುವ ಮೂಲಕ ಇತಿಹಾಸದ ಪುಟಗಳಲ್ಲಿ ತಮ್ಮ ಹೆಸರನ್ನು ಅಚ್ಚಳಿಯದಂತೆ ದಾಖಲಿಸಿದ್ದಾರೆ. ಗ್ರಾಮೀಣ ನೆಲೆಯೊಂದರಿಂದ ಹೊರಟ ಪ್ರತಿಭೆಯೊಂದು ವಿಶ್ವದ ಅತ್ಯಾಧುನಿಕ ಸಾರಿಗೆ ವ್ಯವಸ್ಥೆಯ ಕೇಂದ್ರಬಿಂದುವಾಗಿ ಬೆಳಗಿರುವುದು ಕೇವಲ ವೈಯಕ್ತಿಕ ಸಾಧನೆಯಲ್ಲ, ಇಡೀ ಕನ್ನಡಿಗರ ಸಮುದಾಯಕ್ಕೆ ಹೆಮ್ಮೆಯ ಕ್ಷಣವಾಗಿದೆ.
ಕೊಡಗು, ಜುಲೈ 1: ಪ್ರತಿಭೆ, ಪರಿಶ್ರಮ ಮತ್ತು ಸಮರ್ಪಣಾ ಮನೋಭಾವ ಇದ್ದರೆ ವಿಶ್ವದ ಯಾವುದೇ ಮೂಲೆಯಲ್ಲಿದ್ದರೂ ಯಶಸ್ಸಿನ ಶಿಖರವನ್ನು ತಲುಪಬಹುದು ಎಂಬುದನ್ನು ಕೊಡಗು ಜಿಲ್ಲೆಯ ಮಾದಾಪುರ ಮೂಲದ ರಿಯಾಜ್ ನಜೀರ್ ಅವರು ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ. ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ದೇಶದ ಬಹುನಿರೀಕ್ಷಿತ ರಾಷ್ಟ್ರೀಯ ಪ್ರಯಾಣಿಕರ ರೈಲು ಸೇವೆಯಾದ ‘ಎತಿಹಾದ್ ರೈಲು’ ಯೋಜನೆಯ ಚೊಚ್ಚಲ ಪ್ರಯಾಣಿಕರ ರೈಲನ್ನು ಯಶಸ್ವಿಯಾಗಿ ಚಲಾಯಿಸುವ ಮೂಲಕ ಅವರು ಜಾಗತಿಕ ಸಾರಿಗೆ ಕ್ಷೇತ್ರದಲ್ಲಿ ಐತಿಹಾಸಿಕ ಸಾಧನೆ ಮಾಡಿದ್ದಾರೆ.
ಜೂನ್ 30, 2026ರಂದು ನಡೆದ ಈ ಮಹತ್ವದ ಉದ್ಘಾಟನಾ ಪ್ರಯಾಣವನ್ನು ಮುನ್ನಡೆಸುವ ಅವಕಾಶ ರಿಯಾಜ್ ನಜೀರ್ ಅವರಿಗೆ ದೊರೆತಿದ್ದು, ಇದು ಇಡೀ ಕರ್ನಾಟಕ ಮತ್ತು ಭಾರತಕ್ಕೆ ಹೆಮ್ಮೆಯ ವಿಷಯವಾಗಿದೆ. ವಿದೇಶಿ ನೆಲದಲ್ಲಿ ಕನ್ನಡಿಗರ ಪ್ರತಿಭೆ ಮತ್ತೊಮ್ಮೆ ವಿಶ್ವ ಮಟ್ಟದಲ್ಲಿ ಗುರುತಿಸಿಕೊಂಡಿರುವುದು ವಿಶೇಷವಾಗಿದೆ.
ರಿಯಾಜ್ ನಜೀರ್ ಅವರು ಮಾದಾಪುರದ ಗೌರವಾನ್ವಿತ ಕುಟುಂಬದ ಸದಸ್ಯರಾಗಿದ್ದಾರೆ. ಇವರ ತಂದೆ ನಜೀರ್ ಅವರು ಸ್ಥಳೀಯ ಜಮಾಅತ್ನ ಸಕ್ರಿಯ ಸದಸ್ಯರಾಗಿದ್ದು, ಹಲವು ಸಾಮಾಜಿಕ ಮತ್ತು ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಮುಂಚೂಣಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಇವರ ತಾತ ಮಮ್ಮು ಮುಕ್ರಿಚ್ಚ ಅವರು ತಮ್ಮ ಕಾಲದಲ್ಲಿ ಮಾದಾಪುರ ಮಸೀದಿಯಲ್ಲಿ ಸುದೀರ್ಘ ಅವಧಿಯ ಸೇವೆ ಸಲ್ಲಿಸಿ ಜನಮಾನಸದಲ್ಲಿ ವಿಶಿಷ್ಟ ಸ್ಥಾನ ಪಡೆದಿದ್ದರು. ಸಾಮಾಜಿಕ ಮತ್ತು ಧಾರ್ಮಿಕ ಮೌಲ್ಯಗಳನ್ನು ಪೋಷಿಸಿಕೊಂಡು ಬಂದಿರುವ ಈ ಕುಟುಂಬದ ಮೂರನೇ ತಲೆಮಾರಿನ ಪ್ರತಿನಿಧಿಯಾಗಿ ರಿಯಾಜ್ ನಜೀರ್ ಇಂದು ಜಾಗತಿಕ ಮಟ್ಟದಲ್ಲಿ ಹೆಸರು ಮಾಡಿರುವುದು ಗಮನಾರ್ಹವಾಗಿದೆ.
ಪ್ರಸ್ತುತ ಅಬುಧಾಬಿಯಲ್ಲಿ ರೈಲ್ವೆ ಪೈಲಟ್ (ಲೋಕೋ ಪೈಲಟ್) ಆಗಿ ಕಾರ್ಯನಿರ್ವಹಿಸುತ್ತಿರುವ ರಿಯಾಜ್ ನಜೀರ್ ಅವರಿಗೆ ಇಂತಹ ಪ್ರತಿಷ್ಠಿತ ಜವಾಬ್ದಾರಿ ಹೊಸದೇನಲ್ಲ. ಈ ಹಿಂದೆ ಅವರು ಕತಾರ್ ಮೆಟ್ರೋ ಹಾಗೂ ಕತಾರ್ ಟ್ರಾಮ್ ಜಾಲಗಳ ಉದ್ಘಾಟನಾ ಕಾರ್ಯಾಚರಣೆಗಳಲ್ಲಿಯೂ ಮುಖ್ಯ ಕ್ಯಾಪ್ಟನ್ ಆಗಿ ಯಶಸ್ವಿಯಾಗಿ ಕರ್ತವ್ಯ ನಿರ್ವಹಿಸಿದ್ದರು. ಉನ್ನತ ಮಟ್ಟದ ಮತ್ತು ಸವಾಲಿನ ಸಾರಿಗೆ ಯೋಜನೆಗಳ ಕಾರ್ಯಾಚರಣೆಯಲ್ಲಿ ಹೊಂದಿರುವ ಅವರ ಅಪಾರ ಅನುಭವವೇ, ಎತಿಹಾದ್ ರೈಲಿನ ಚೊಚ್ಚಲ ಪ್ರಯಾಣವನ್ನು ಮುನ್ನಡೆಸುವ ಅವಕಾಶ ದೊರಕಲು ಪ್ರಮುಖ ಕಾರಣವಾಗಿದೆ ಎಂದು ತಿಳಿದುಬಂದಿದೆ.
ಕೊಡಗಿನ ಹೆಮ್ಮೆಯ ಪುತ್ರ ರಿಯಾಜ್ ನಜೀರ್ ಅವರು ವಿಶ್ವ ವೇದಿಕೆಯಲ್ಲಿ ಕನ್ನಡಿಗರ ಸಾಮರ್ಥ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದು, ಅವರ ಮುಂದಿನ ವೃತ್ತಿಜೀವನ ಇನ್ನಷ್ಟು ಯಶಸ್ಸು ಮತ್ತು ಕೀರ್ತಿಯಿಂದ ಕೂಡಿರಲಿ ಎಂದು ಎಲ್ಲೆಡೆಯಿಂದ ಶುಭ ಹಾರೈಕೆಗಳು ವ್ಯಕ್ತವಾಗುತ್ತಿವೆ
ಏನಿದು ಎತಿಹಾದ್ ರೈಲು ಜಾಲ?
ಇದುವರೆಗೆ ಯುಎಇಯಲ್ಲಿ ಭಾರತದಂತಹ ವ್ಯಾಪಕ ರಾಷ್ಟ್ರೀಯ ಪ್ರಯಾಣಿಕ ರೈಲು ಜಾಲ ವ್ಯವಸ್ಥೆ ಇರಲಿಲ್ಲ ..!!
ಅಬುಧಾಬಿ: ಸಂಯುಕ್ತ ಅರಬ್ ಎಮಿರೇಟ್ಸ್ (ಯುಎಇ) ದೇಶದ ಸಾರಿಗೆ ಕ್ಷೇತ್ರದಲ್ಲಿ ಮಹತ್ತರ ಬದಲಾವಣೆಯನ್ನು ತರಲು ರೂಪುಗೊಂಡಿರುವ “ಎತಿಹಾದ್ ರೈಲು” ಯೋಜನೆಯು ವಿಶ್ವದ ಗಮನ ಸೆಳೆಯುತ್ತಿದೆ. ದೇಶದ ವಿವಿಧ ಎಮಿರೇಟ್ಗಳು, ಪ್ರಮುಖ ನಗರಗಳು ಹಾಗೂ ಕೈಗಾರಿಕಾ ವಲಯಗಳನ್ನು ಒಂದೇ ರೈಲು ಜಾಲದ ಮೂಲಕ ಸಂಪರ್ಕಿಸುವ ಉದ್ದೇಶದಿಂದ ಈ ರಾಷ್ಟ್ರೀಯ ರೈಲು ಯೋಜನೆಯನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ.
ಎತಿಹಾದ್ ರೈಲು ಎಂಬುದು ಕೇವಲ ಒಂದು ರೈಲಿನ ಹೆಸರಲ್ಲ. ಇದು ಯುಎಇ ಸರ್ಕಾರದ ಮಹತ್ವಾಕಾಂಕ್ಷೆಯ ರಾಷ್ಟ್ರೀಯ ರೈಲು ಜಾಲ ಯೋಜನೆಯಾಗಿದ್ದು, ದೇಶದಾದ್ಯಂತ ಸರಕು ಸಾಗಣೆ ಮತ್ತು ಪ್ರಯಾಣಿಕರ ಸಂಚಾರವನ್ನು ಸುಲಭಗೊಳಿಸುವ ಗುರಿಯನ್ನು ಹೊಂದಿದೆ. ಈ ಯೋಜನೆಯ ಮೂಲಕ ದೇಶದ ವಿವಿಧ ಭಾಗಗಳನ್ನು ವೇಗದ ಮತ್ತು ಆಧುನಿಕ ರೈಲು ಸೇವೆಯ ಮೂಲಕ ಸಂಪರ್ಕಿಸಲು ಕ್ರಮ ಕೈಗೊಳ್ಳಲಾಗಿದೆ.
ಇದುವರೆಗೆ ಯುಎಇಯಲ್ಲಿ ಭಾರತದಂತಹ ವ್ಯಾಪಕ ರಾಷ್ಟ್ರೀಯ ಪ್ರಯಾಣಿಕ ರೈಲು ಜಾಲ ವ್ಯವಸ್ಥೆ ಇರಲಿಲ್ಲ. ದೇಶದ ಸಾರಿಗೆ ವ್ಯವಸ್ಥೆಯು ಮುಖ್ಯವಾಗಿ ರಸ್ತೆ ಮತ್ತು ವಾಯು ಮಾರ್ಗಗಳನ್ನೇ ಅವಲಂಬಿಸಿತ್ತು. ಆದರೆ, ಎತಿಹಾದ್ ರೈಲು ಯೋಜನೆಯ ಮೂಲಕ ಅಬುಧಾಬಿ, ದುಬೈ ಸೇರಿದಂತೆ ಹಲವು ಪ್ರಮುಖ ನಗರಗಳನ್ನು ಸಂಪರ್ಕಿಸುವ ಕಾರ್ಯ ಹಂತ ಹಂತವಾಗಿ ನಡೆಯುತ್ತಿದೆ.
ಈ ರೈಲು ಜಾಲವು ಸರಕು ಸಾಗಣೆಯ ವೆಚ್ಚವನ್ನು ಕಡಿಮೆ ಮಾಡುವುದರ ಜೊತೆಗೆ, ಆರ್ಥಿಕ ಅಭಿವೃದ್ಧಿ, ಕೈಗಾರಿಕಾ ಬೆಳವಣಿಗೆ ಮತ್ತು ಸುಸ್ಥಿರ ಸಾರಿಗೆ ವ್ಯವಸ್ಥೆಗೆ ಮಹತ್ವದ ಕೊಡುಗೆ ನೀಡಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಭವಿಷ್ಯದಲ್ಲಿ ಪ್ರಯಾಣಿಕರ ಸೇವೆಯನ್ನು ವಿಸ್ತರಿಸುವ ಮೂಲಕ ಯುಎಇಯ ಸಾರಿಗೆ ಕ್ಷೇತ್ರದಲ್ಲಿ ಹೊಸ ಅಧ್ಯಾಯ ಆರಂಭವಾಗುವ ನಿರೀಕ್ಷೆಯಿದೆ.
ಎತಿಹಾದ್ ರೈಲು ಯೋಜನೆಯು ಪೂರ್ಣಗೊಂಡ ಬಳಿಕ, ಯುಎಇ ದೇಶದ ವಿವಿಧ ಭಾಗಗಳ ನಡುವಿನ ಸಂಪರ್ಕ ವ್ಯವಸ್ಥೆ ಮತ್ತಷ್ಟು ಬಲವಾಗಲಿದ್ದು, ಇದು ಮಧ್ಯಪ್ರಾಚ್ಯದ ಅತ್ಯಂತ ಆಧುನಿಕ ರಾಷ್ಟ್ರೀಯ ರೈಲು ಜಾಲಗಳಲ್ಲಿ ಒಂದಾಗಿ ಗುರುತಿಸಿಕೊಳ್ಳುವ ಸಾಧ್ಯತೆ ಇದೆ.
m
