ಸುಳ್ಯ: ಕೊಡಿಯಾಲಬೈಲು ಅಗಲಿದ ಹಿರಿಯ ಸದಸ್ಯ ರವೀಂದ್ರ ರೈ ಕುಟುಂಬಕ್ಕೆ ಯುವಕ–ಯುವತಿ ಮಂಡಲಗಳಿಂದ ಆರ್ಥಿಕ ನೆರವು

ಸಮಾಜದಲ್ಲಿ ಪರಸ್ಪರ ಸಹಕಾರ, ಸಹಾನುಭೂತಿ ಮತ್ತು ಮಾನವೀಯತೆಯ ಮೌಲ್ಯಗಳನ್ನು ಜೀವಂತವಾಗಿರಿಸುವ ಇಂತಹ ಕಾರ್ಯಗಳು ಸಂಘಟನೆಗಳ ಸಾಮಾಜಿಕ ಹೊಣೆಗಾರಿಕೆಗೆ ಮಾದರಿಯಾಗಿವೆ.

ಸುಳ್ಯ, ಅ.6: ಕೊಡಿಯಾಲಬೈಲಿನ ಶ್ರೀ ವಿಷ್ಣು ಯುವಕ ಮಂಡಳಿಯ ಸಕ್ರಿಯ ಹಿರಿಯ ಸದಸ್ಯರಾಗಿದ್ದ ಇತ್ತೀಚೆಗೆ ನಿಧನರಾದ ರವೀಂದ್ರ ರೈ ಅವರ ಕುಟುಂಬಕ್ಕೆ ಶ್ರೀ ವಿಷ್ಣು ಯುವಕ ಮಂಡಲ ಹಾಗೂ ಶ್ರೀ ವರಲಕ್ಷ್ಮಿ ಯುವತಿ ಮಂಡಲದ ಸರ್ವ ಸದಸ್ಯರ ಸಹಕಾರದಿಂದ ಆರ್ಥಿಕ ನೆರವು ನೀಡಿ, ಕುಟುಂಬದ ದುಃಖದಲ್ಲಿ ಭಾಗಿಯಾಗುವ ಮೂಲಕ ಮಾನವೀಯ ಕಾಳಜಿ ಮೆರೆದರು. ರವೀಂದ್ರ ರೈ ಅವರು ತಮ್ಮ ಜೀವಿತಾವಧಿಯಲ್ಲಿ ಎಲ್ಲರೊಂದಿಗೆ ಆತ್ಮೀಯವಾಗಿ ಬೆರೆಯುವ ಮೂಲಕ ಉತ್ತಮ ಸ್ನೇಹ–ಸಂಬಂಧಗಳನ್ನು ಬೆಳೆಸಿಕೊಂಡಿದ್ದರು. ಸರಳತೆ, ಸೌಜನ್ಯ ಹಾಗೂ ಸಹೃದಯತೆಯಿಂದ ಎಲ್ಲರ ಮನಸ್ಸಿನಲ್ಲಿ ವಿಶೇಷ ಸ್ಥಾನ ಪಡೆದಿದ್ದ ಅವರು, ಯುವಕ ಮಂಡಲದ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡು ಸಮಾಜಮುಖಿ ಕಾರ್ಯಗಳಿಗೆ ಸದಾ ಬೆಂಬಲ ನೀಡುತ್ತಿದ್ದರು. ಅವರ ಅಗಲಿಕೆ ಕೊಡಿಯಾಲಬೈಲು ಪರಿಸರದ ಸಾಮಾಜಿಕ ಹಾಗೂ ಸಾಂಸ್ಕೃತಿಕ ವಲಯದಲ್ಲಿ ತುಂಬಲಾರದ ಶೂನ್ಯವನ್ನು ಸೃಷ್ಟಿಸಿದೆ. ಒಡನಾಡಿಗಳೊಂದಿಗೆ ನಗುನಗುತ್ತಾ ಬೆರೆತು, ಅಗತ್ಯವಿದ್ದಾಗ ನೆರವಿಗೆ ಧಾವಿಸುತ್ತಿದ್ದ ಅವರ ಆತ್ಮೀಯ ಒಡನಾಟವನ್ನು ಸ್ನೇಹಿತರು ಹಾಗೂ ಸಂಘಟನೆಯ ಸದಸ್ಯರು ಭಾವುಕರಾಗಿ ಸ್ಮರಿಸಿದರು. ಅಗಲಿದ ಸದಸ್ಯನ ಕುಟುಂಬದ ನೋವಿಗೆ ಸ್ಪಂದಿಸಿ, ಸಂಕಷ್ಟದ ಸಂದರ್ಭದಲ್ಲಿ ನೆರವಿನ ಹಸ್ತ ಚಾಚಿರುವ ಶ್ರೀ ವಿಷ್ಣು ಯುವಕ ಮಂಡಲ ಹಾಗೂ ಶ್ರೀ ವರಲಕ್ಷ್ಮಿ ಯುವತಿ ಮಂಡಲಗಳ ಕಾರ್ಯವು ಕೇವಲ ಆರ್ಥಿಕ ಸಹಾಯಕ್ಕೆ ಸೀಮಿತವಾಗದೆ ಸಮಾಜದಲ್ಲಿ ಪರಸ್ಪರ ಸಹಕಾರ, ಸಹಾನುಭೂತಿ ಮತ್ತು ಮಾನವೀಯತೆಯ ಮೌಲ್ಯಗಳನ್ನು ಜೀವಂತವಾಗಿರಿಸುವ ಇಂತಹ ಕಾರ್ಯಗಳು ಸಂಘಟನೆಗಳ ಸಾಮಾಜಿಕ ಹೊಣೆಗಾರಿಕೆಗೆ ಮಾದರಿಯಾಗಿವೆ.

ಈ ಸಂದರ್ಭದಲ್ಲಿ ಯುವಕ ಮಂಡಲ ಅಧ್ಯಕ್ಷ,ರಾಧಾಕೃಷ್ಣ ಬೇರ್ಪಡ್ಕ,ಯುವತಿ ಮಂಡಲ ಅಧ್ಯಕ್ಷೆ,ಶ್ರೀಮತಿ ಪದ್ಮಾವತಿ ಕೊಡಿಯಾಲಬೈಲು, ಜಟ್ಟಿಪಳ್ಳದ ಮಾಜಿ ನಗರ ಪಂಚಾಯತ್ ಸದಸ್ಯ ರಮಾನಂದ ರೈ, ರಘುನಾಥ್ ಜಟ್ಟಿಪಳ್ಳ ಹಾಗೂ ಯುವಕ, ಯುವತಿ ಮಂಡಲಗಳ ಸದಸ್ಯರು ಉಪಸ್ಥಿತರಿದ್ದರು.