ಇನ್‌ಸ್ಟಾಗ್ರಾಮ್ ಒಂದರಲ್ಲೇ 1.75 ಕೋಟಿ ಬಳಕೆದಾರರ ಡೇಟಾ ಬಹಿರಂಗ; ಇನ್‌ಫೋಸ್ಟೀಲಿಂಗ್ ಮಾಲ್‌ವೇರ್ ಶಂಕೆ, ಬಳಕೆದಾರರ ಗೌಪ್ಯತೆಗೆ ಗಂಭೀರ ಆತಂಕ
ನವದೆಹಲಿ:
ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ಜಿಮೇಲ್ ಹಾಗೂ ನೆಟ್‌ಫ್ಲಿಕ್ಸ್ ಸೇರಿದಂತೆ ಸಾಮಾಜಿಕ ಮಾಧ್ಯಮ ಮತ್ತು ಒಟಿಟಿ ಪ್ಲಾಟ್‌ಫಾರ್ಮ್‌ಗಳಿಂದ 149 ಮಿಲಿಯನ್‌ಗಿಂತಲೂ ಹೆಚ್ಚು ಪಾಸ್‌ವರ್ಡ್‌ಗಳು ಸೋರಿಕೆಯಾಗಿವೆ ಎಂಬ ಆತಂಕಕಾರಿ ವರದಿ ಬಹಿರಂಗವಾಗಿದೆ.
ಭದ್ರತಾ ಸಂಶೋಧಕ ಜೆರೆಮಿಯಾ ಫೌಲರ್ ಬಿಡುಗಡೆ ಮಾಡಿದ ಈ ವರದಿ, ಬಳಕೆದಾರರ ಗೌಪ್ಯತೆ ಮತ್ತು ಡೇಟಾ ಭದ್ರತೆ ಕುರಿತು ಗಂಭೀರ ಕಳವಳ ಮೂಡಿಸಿದೆ. ಸಾರ್ವಜನಿಕರಿಗೆ ಮುಕ್ತವಾಗಿ ಪ್ರವೇಶಿಸಬಹುದಾದ ರೂಪದಲ್ಲಿ ಈ ಮಾಹಿತಿಯು ಆನ್‌ಲೈನ್‌ನಲ್ಲಿ ಲಭ್ಯವಿತ್ತು ಎಂದು ಫೌಲರ್ ತಿಳಿಸಿದ್ದಾರೆ.
ಸಾಮಾಜಿಕ ಮಾಧ್ಯಮ ಖಾತೆಗಳ ಜೊತೆಗೆ ಹಣಕಾಸು ಸೇವೆಗಳ ಖಾತೆಗಳು, ಕ್ರಿಪ್ಟೋ ವಾಲೆಟ್‌ಗಳು, ವ್ಯಾಪಾರಿಕ ಖಾತೆಗಳು, ಬ್ಯಾಂಕಿಂಗ್ ಹಾಗೂ ಕ್ರೆಡಿಟ್ ಕಾರ್ಡ್ ಮಾಹಿತಿಯೂ ಸೋರಿಕೆಯಾಗಿರುವುದು ಬೆಳಕಿಗೆ ಬಂದಿದೆ. ಇದಲ್ಲದೆ, ಹಲವಾರು ದೇಶಗಳ “.gov” ಡೊಮೇನ್‌ಗಳಿಗೆ ಸಂಬಂಧಿಸಿದ ರುಜುವಾತುಗಳ ಸೋರಿಕೆ ಕೂಡ ಅತ್ಯಂತ ಗಂಭೀರ ವಿಷಯವಾಗಿದೆ ಎಂದು ಅವರು ಎಚ್ಚರಿಸಿದ್ದಾರೆ.
ಪ್ರಸ್ತುತ ಆನ್‌ಲೈನ್‌ನಲ್ಲಿ ಲಭ್ಯವಿದ್ದ ಎಲ್ಲಾ ಮಾಹಿತಿಯನ್ನು ತೆಗೆದುಹಾಕಲಾಗಿದೆ. ಆದರೆ ಈ ಡೇಟಾ ಸೋರಿಕೆಯಿಂದ ಎಷ್ಟು ಪ್ರಮಾಣದ ಹಾನಿ ಸಂಭವಿಸಿದೆ ಎಂಬುದನ್ನು ಅಂದಾಜಿಸಲು ಸಾಧ್ಯವಿಲ್ಲ ಎಂದು ಬ್ಲ್ಯಾಕ್ ಡಕ್‌ನ ಹಿರಿಯ ಭದ್ರತಾ ಎಂಜಿನಿಯರ್ ಬೋರಿಸ್ ಸಿಪೋಟ್ ಹೇಳಿದ್ದಾರೆ.
ಬಳಕೆದಾರರ ಸಾಧನಗಳಿಗೆ ಸೋಂಕು ತಗುಲಿ, ಅವರ ಕೀಬೋರ್ಡ್ ಇನ್‌ಪುಟ್‌ಗಳು ಹಾಗೂ ಚಟುವಟಿಕೆಗಳನ್ನು ದಾಖಲಿಸುವ ಇನ್‌ಫೋಸ್ಟೀಲಿಂಗ್ ಮಾಲ್‌ವೇರ್ ಬಳಸಿ ಈ ಮಾಹಿತಿಯನ್ನು ಸಂಗ್ರಹಿಸಿ ಸೋರಿಕೆ ಮಾಡಲಾಗಿದೆ ಎಂಬ ಶಂಕೆಯನ್ನು ಫೌಲರ್ ವ್ಯಕ್ತಪಡಿಸಿದ್ದಾರೆ.
ವಿಶೇಷವಾಗಿ ಇನ್‌ಸ್ಟಾಗ್ರಾಮ್ ಒಂದರಲ್ಲೇ ಸುಮಾರು 1.75 ಕೋಟಿ ಬಳಕೆದಾರರ ಡೇಟಾ ಸೋರಿಕೆಯಾಗಿದೆ. ಇನ್‌ಸ್ಟಾಗ್ರಾಮ್‌ನಿಂದ ಸೋರಿಕೆಯಾದ ಈ ಮಾಹಿತಿಯು ಡಾರ್ಕ್ ವೆಬ್‌ನಲ್ಲಿ ಹರಿದಾಡುತ್ತಿದೆ ಎಂಬ ವರದಿಗಳೂ ಲಭ್ಯವಿವೆ.
ಸೋರಿಕೆಯಾದ ಮಾಹಿತಿಯಲ್ಲಿ ಬಳಕೆದಾರಹೆಸರುಗಳು, ಫೋನ್ ಸಂಖ್ಯೆಗಳು, ಇಮೇಲ್ ವಿಳಾಸಗಳು ಸೇರಿದಂತೆ ವೈಯಕ್ತಿಕ ವಿವರಗಳು ಸೇರಿವೆ. ಈ ಹಿನ್ನೆಲೆಯಲ್ಲಿ ಬಳಕೆದಾರರು ತಮ್ಮ ಖಾತೆಗಳ ಪಾಸ್‌ವರ್ಡ್‌ಗಳನ್ನು ತಕ್ಷಣ ಬದಲಾಯಿಸುವುದು, ಎರಡು ಹಂತದ ದೃಢೀಕರಣ (Two-Factor Authentication) ಅಳವಡಿಸಿಕೊಳ್ಳುವುದು ಹಾಗೂ ಅನುಮಾನಾಸ್ಪದ ಲಿಂಕ್‌ಗಳನ್ನು ತಪ್ಪಿಸುವಂತೆ ಭದ್ರತಾ ತಜ್ಞರು ಸಲಹೆ ನೀಡಿದ್ದಾರೆ.
