ಮನರೇಗಾ ಬಚಾವ್ ಪಾದಯಾತ್ರೆಯಲ್ಲಿ ಉದ್ಯಮಿ ಸಲೀಂ ಪೆರುಂಗೊಡಿ ಸಕ್ರಿಯ ಭಾಗವಹಿಕೆ

ಬಿಡುವಿಲ್ಲದ ಉದ್ಯಮ ಜೀವನದಿಂದ ನಾಲ್ಕು ದಿನ ಹೊರಬಂದು ಗ್ರಾಮೀಣ ಕಾರ್ಮಿಕರ ಹಕ್ಕುಗಳಿಗಾಗಿ ಹೋರಾಟಕ್ಕೆ ಬೆಂಬಲ

ಸುಳ್ಯ, ಫೆ.12: ಉದ್ಯಮಿ ಹಾಗೂ ಕಾಂಗ್ರೆಸ್ ಪಕ್ಷದ ಮುಖಂಡ, ಟಿ.ಎಂ. ಶಹೀದ್ ಆಪ್ತರಾದ ಸಲೀಂ ಪೆರುಂಗೊಡಿ ಅವರು ತಮ್ಮ ನಿರಂತರ ಬಿಡುವು ಇಲ್ಲದ ಉದ್ಯಮ ಜೀವನದಿಂದ ನಾಲ್ಕು ದಿನಗಳ ಕಾಲ ದೂರವಿದ್ದು, ಕಾಂಗ್ರೆಸ್ ಪಕ್ಷ ಹಮ್ಮಿಕೊಂಡ “ಮಹಾತ್ಮಗಾಂಧಿ ಮನರೇಗಾ ಬಚಾವ್ ಸಂಗ್ರಾಮ” ಪಾದಯಾತ್ರೆಯಲ್ಲಿ ಸಕ್ರಿಯವಾಗಿ ಪಾಲ್ಗೊಂಡಿದ್ದಾರೆ.
ಫೆಬ್ರವರಿ 9ರಿಂದ ಫೆಬ್ರವರಿ 12ರವರೆಗೆ ನಡೆದ ನಾಲ್ಕು ದಿನಗಳ ಪಾದಯಾತ್ರೆಯಲ್ಲಿ ಭಾಗವಹಿಸಿದ ಅವರು, ಗ್ರಾಮೀಣ ಜನರ ಹಕ್ಕುಗಳ ರಕ್ಷಣೆಗೆ ತಾವು ಬದ್ಧರಾಗಿರುವುದನ್ನು ಸ್ಪಷ್ಟಪಡಿಸಿದರು. ಉದ್ಯಮ ಕ್ಷೇತ್ರದಲ್ಲಿ ಸದಾ ತೊಡಗಿಸಿಕೊಂಡಿರುವ ಸಲೀಂ ಅವರು ಹೋರಾಟಕ್ಕಾಗಿ ಸಮಯ ಮೀಸಲಿಟ್ಟಿರುವುದು ಗಮನ ಸೆಳೆಯಿತು.
ಈ ಕುರಿತು ಮಾತನಾಡಿದ ಸಲೀಂ ಪೆರುಂಗೊಡಿ, “ಮಹಾತ್ಮಾಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆ (MGNREGA) ದೇಶದ ಗ್ರಾಮೀಣ ಬಡ ಜನರ ಜೀವನಾಡಿಯಾಗಿದೆ. ಯೋಜನೆಯ ಹೆಸರು ಮತ್ತು ಸ್ವರೂಪದಲ್ಲಿ ಕೇಂದ್ರ ಸರ್ಕಾರ ಮಾಡುತ್ತಿರುವ ಬದಲಾವಣೆಗಳು ಅದರ ಮೂಲ ಉದ್ದೇಶಕ್ಕೆ ಧಕ್ಕೆಯಾಗುವ ಸಾಧ್ಯತೆ ಇದೆ. ಗ್ರಾಮೀಣ ಕಾರ್ಮಿಕರ ಹಕ್ಕುಗಳನ್ನು ಕಾಪಾಡುವ ದೃಷ್ಟಿಯಿಂದ ಈ ಹೋರಾಟದಲ್ಲಿ ಭಾಗವಹಿಸುವುದು ನನ್ನ ಕರ್ತವ್ಯವೆಂದು ಭಾವಿಸಿದ್ದೇನೆ,” ಎಂದು ಹೇಳಿದರು.
ಅವರು ಮುಂದುವರೆದು, “ಮನರೇಗಾ ಯೋಜನೆ ಅನೇಕ ಕುಟುಂಬಗಳಿಗೆ ಆರ್ಥಿಕ ಭದ್ರತೆ ನೀಡಿದೆ. ಯಾವುದೇ ಬದಲಾವಣೆಗಳು ಕಾರ್ಮಿಕರ ಹಿತಾಸಕ್ತಿಗೆ ವಿರುದ್ಧವಾಗಬಾರದು. ಯೋಜನೆಯ ಮೂಲ ಸಿದ್ಧಾಂತಗಳನ್ನು ಉಳಿಸಿ, ಗ್ರಾಮೀಣ ಅಭಿವೃದ್ಧಿಗೆ ಹೆಚ್ಚಿನ ಒತ್ತು ನೀಡಬೇಕು,” ಎಂದು ಅಭಿಪ್ರಾಯಪಟ್ಟರು.
ಪಾದಯಾತ್ರೆಯ ವೇಳೆ ಪಕ್ಷದ ಮುಖಂಡರು ಹಾಗೂ ಕಾರ್ಯಕರ್ತರು ಗ್ರಾಮಾಂತರ ಪ್ರದೇಶಗಳಲ್ಲಿ ಜನಜಾಗೃತಿ ಮೂಡಿಸಿ, ಯೋಜನೆಯ ಮಹತ್ವ ಮತ್ತು ಅದರ ಉಳಿವಿನ ಅಗತ್ಯತೆಯನ್ನು ವಿವರಿಸಿದರು.