ದೇಶದ ಯುವಜನರಲ್ಲಿ ಸಂಚಲನ ಮೂಡಿಸಿದ್ದ ಕಾಕ್ರೋಚ್ ಜನತಾ ಪಕ್ಷದ ‘ಎಕ್ಸ್’ ಖಾತೆಗೆ ಭಾರತದಲ್ಲಿ ತಡೆ

ಕಾನೂನುಬದ್ಧ ಬೇಡಿಕೆಯ ಹಿನ್ನೆಲೆ ಖಾತೆ ನಿರ್ಬಂಧ; ಸಾಮಾಜಿಕ ಜಾಲತಾಣಗಳಲ್ಲಿ ವಿಡಂಬನಾತ್ಮಕ ರಾಜಕೀಯ ಅಭಿಯಾನಕ್ಕೆ ಭಾರೀ ಚರ್ಚೆ!

ನವದೆಹಲಿ: ವಿಡಂಬನಾತ್ಮಕ ರಾಜಕೀಯ ಅಭಿಯಾನವಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದ್ದ ‘ಕಾಕ್ರೋಚ್ ಜನತಾ ಪಾರ್ಟಿ’ (CJP) ಯ ಎಕ್ಸ್ (ಹಳೆಯ ಟ್ವಿಟರ್) ಖಾತೆಯನ್ನು ಭಾರತದಲ್ಲಿ ತಡೆಹಿಡಿಯಲಾಗಿದೆ ಎಂದು ಸಂಸ್ಥಾಪಕ ಅಭಿಜೀತ್ ದೀಪ್ಕೆ ತಿಳಿಸಿದ್ದಾರೆ.
ಕಾನೂನುಬದ್ಧ ಬೇಡಿಕೆಯ ಹಿನ್ನೆಲೆಯಲ್ಲಿ ಖಾತೆಯನ್ನು ಭಾರತದಲ್ಲಿ ನಿರ್ಬಂಧಿಸಲಾಗಿದೆ ಎಂದು ಸಿಜೆಪಿ ಎಕ್ಸ್ ಹ್ಯಾಂಡಲ್‌ನಲ್ಲಿ ಸೂಚನೆ ಕಾಣಿಸಿಕೊಂಡಿದೆ. ಆದರೆ, ಈ ವರದಿ ಪ್ರಕಟವಾಗುವ ವೇಳೆಗೆ ಸಿಜೆಪಿಯ ಇನ್‌ಸ್ಟಾಗ್ರಾಂ ಖಾತೆ 12.6 ಮಿಲಿಯನ್ ಅನುಯಾಯಿಗಳೊಂದಿಗೆ ಸಕ್ರಿಯವಾಗಿಯೇ ಮುಂದುವರಿದಿದೆ.

ಕಳೆದ ವಾರ ಆರಂಭವಾದ ಈ ವಿಡಂಬನಾತ್ಮಕ ರಾಜಕೀಯ ವೇದಿಕೆ ಕೆಲವೇ ದಿನಗಳಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಅಪಾರ ಗಮನ ಸೆಳೆದಿತ್ತು. ಸಿಜೆಪಿ ತನ್ನ ಎಕ್ಸ್ ಖಾತೆಯಲ್ಲಿ ಸುಮಾರು 2 ಲಕ್ಷ ಅನುಯಾಯಿಗಳನ್ನು ಹೊಂದಿದ್ದರೆ, ಪಕ್ಷದ ಸದಸ್ಯತ್ವ ನೋಂದಣಿಗಳು 6 ಲಕ್ಷಕ್ಕೂ ಅಧಿಕವಾಗಿದೆ ಎಂದು ಹೇಳಲಾಗಿದೆ.

ಎಕ್ಸ್ ಸಂಸ್ಥೆಯ ನಿಯಮಾವಳಿಗಳ ಪ್ರಕಾರ, “ಅಧಿಕೃತ ಸಂಸ್ಥೆಯಿಂದ ಮಾನ್ಯ ಹಾಗೂ ಸರಿಯಾದ ವ್ಯಾಪ್ತಿಯ ಕಾನೂನುಬದ್ಧ ವಿನಂತಿ ಬಂದಲ್ಲಿ, ಕೆಲವು ದೇಶಗಳಲ್ಲಿ ನಿರ್ದಿಷ್ಟ ವಿಷಯಗಳಿಗೆ ಪ್ರವೇಶವನ್ನು ತಡೆಹಿಡಿಯಬಹುದು” ಎಂದು ಹೇಳಲಾಗಿದೆ. ಇದೇ ನಿಯಮದಡಿ ಸಿಜೆಪಿಯ ಖಾತೆ ಭಾರತದಲ್ಲಿ ನಿರ್ಬಂಧಿತಗೊಂಡಿದೆ ಎಂದು ತಿಳಿದುಬಂದಿದೆ.

ಭಾರತದ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರು ಯುವ ನಿರುದ್ಯೋಗಿಗಳನ್ನು “ಜಿರಳೆಗಳಂತೆ” ಎಂದು ಉಲ್ಲೇಖಿಸಿದ್ದಾರೆಯೆಂಬ ವಿವಾದಾತ್ಮಕ ಹೇಳಿಕೆಯನ್ನು ವ್ಯಂಗ್ಯ ರೂಪದಲ್ಲಿ ಬಳಸಿಕೊಂಡು ಈ ಅಭಿಯಾನ ಆರಂಭಗೊಂಡಿತ್ತು. ಆಡಳಿತಾರೂಢ ಭಾರತೀಯ ಜನತಾ ಪಕ್ಷ (ಬಿಜೆಪಿ) ಯ ಹೆಸರಿನ ಮೇಲಿನ ವ್ಯಂಗ್ಯ ರೂಪದಲ್ಲೇ ‘ಕಾಕ್ರೋಚ್ ಜನತಾ ಪಾರ್ಟಿ’ ಎಂಬ ಹೆಸರು ರೂಪುಗೊಂಡಿದೆ.

ಸಿಜೆಪಿಯ ವೆಬ್‌ಸೈಟ್ ತನ್ನನ್ನು “ಸೋಮಾರಿಗಳು ಮತ್ತು ನಿರುದ್ಯೋಗಿಗಳ ಧ್ವನಿ” ಎಂದು ವ್ಯಂಗ್ಯಾತ್ಮಕವಾಗಿ ಪರಿಚಯಿಸಿಕೊಂಡಿದೆ. ಈ ಆನ್‌ಲೈನ್ ಅಭಿಯಾನವನ್ನು ಮೇ 16ರಂದು ಅಭಿಜೀತ್ ದೀಪ್ಕೆ ಆರಂಭಿಸಿದ್ದರು. ಅವರು ಅಮೆರಿಕದ ಬೋಸ್ಟನ್ ವಿಶ್ವವಿದ್ಯಾಲಯದಲ್ಲಿ ಸಾರ್ವಜನಿಕ ಸಂಪರ್ಕ ವಿಷಯದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ ಎಂದು ತಿಳಿದುಬಂದಿದೆ.