ಕೇರಳ : ಕಾಂಗ್ರೆಸ್ ಅಭ್ಯರ್ಥಿ ಮಂಜುಳಾ ರಮೇಶ್ ವಿರುದ್ಧ ಸೋನಿಯಾ ಗಾಂಧಿ ಸ್ಪರ್ಧೆ !??

ತಿರುವನಂತಪುರಂ, ಡಿಸೆಂಬರ್ 4:

ಕೇರಳದಲ್ಲಿ 2025ರ ಸ್ಥಳೀಯ ಸಂಸ್ಥೆಗಳ ಚುನಾವಣೆಗಳ ಘೋಷಣೆಯೊಂದಿಗೆ ರಾಜಕೀಯ ವಾತಾವರಣ ಮತ್ತೆ ಗರಿಗೆದರಿದ್ದು, ಇಡುಕ್ಕಿ ಜಿಲ್ಲೆಯ ಮುನ್ನಾರ್ ಪಂಚಾಯತ್ ಕ್ಷೇತ್ರದಲ್ಲಿ ಒಂದು ಹೆಸರು ಮಾತ್ರ ಈಗ ಎಲ್ಲರ ಗಮನ ಸೆಳೆಯುತ್ತಿದೆ — ಸೋನಿಯಾ ಗಾಂಧಿ!

ಹೌದು, ನೀವು ಓದಿದ್ದು ಸತ್ಯ. ಆದರೆ ಇದು ದೆಹಲಿಯ ‘ಆ ಸೋನಿಯಾ’ ಅಲ್ಲ, ಮುನ್ನಾರ್‌ನ ‘ಈ ಸೋನಿಯಾ’! ಹೆಸರಿನ ಹೋಲಿಕೆ ಮಾತ್ರ, ರಾಜಕೀಯ ದಿಕ್ಕು ಸಂಪೂರ್ಣ ವಿರುದ್ಧ!

ಕಾಂಗ್ರೆಸ್‌ನ ಮಾಜಿ ರಾಷ್ಟ್ರಾಧ್ಯಕ್ಷೆ ಸೋನಿಯಾ ಗಾಂಧಿ ಅವರ ಗೌರವದಿಂದ ಈ ಅಭ್ಯರ್ಥಿಗೆ ಆ ಹೆಸರಿಟ್ಟಿದ್ದು, ಈಗ ಅದೇ ಹೆಸರಿನ ಕಾರಣಕ್ಕೆ ಬಿಜೆಪಿ ಪಾಳಯದಲ್ಲಿ ಅವರು ಸ್ಪರ್ಧಿಸಿ ರಾಜಕೀಯದಲ್ಲಿ ಹೊಸ ಮಜಲು ಬರೆಯುತ್ತಿದ್ದಾರೆ. ಹೆಸರೇ ಇಲ್ಲಿ ಸುದ್ದಿ, ರಾಜಕೀಯ ವಲಯದಲ್ಲಿ ಅಚ್ಚರಿ!

ಕಾಂಗ್ರೆಸ್ಸಿನ ಮಡಿಲಲ್ಲಿ ಹುಟ್ಟಿದ ‘ಬಿಜೆಪಿ ಸೋನಿಯಾ’!

ಈ ಬಿಜೆಪಿ ಅಭ್ಯರ್ಥಿ ಸೋನಿಯಾ ಗಾಂಧಿ ಅವರು ಅಪ್ಪಟ ಮತ್ತು ಸಕ್ರಿಯ ಕಾಂಗ್ರೆಸ್ ಹಿನ್ನೆಲೆಯ ಕುಟುಂಬದಲ್ಲಿ ಜನಿಸಿದವರು. ಅವರ ತಂದೆ ದಿವಂಗತ ದುರೈರಾಜ್ ಮುನ್ನಾರ್ ಪಂಚಾಯತ್ ವ್ಯಾಪ್ತಿಯಲ್ಲಿ ಖ್ಯಾತ ಕಾಂಗ್ರೆಸ್ ನಾಯಕರಾಗಿದ್ದರು. ಕಾಂಗ್ರೆಸ್‌ನೊಂದಿಗೆ ಜೀವನಪೂರ್ತಿ ನಂಟು ಹೊಂದಿದ್ದ ಅವರು, ರಾಷ್ಟ್ರ ಮಟ್ಟದ ನಾಯಕಿ ಸೋನಿಯಾ ಗಾಂಧಿಯ ಮೇಲಿನ ಅಪಾರ ಗೌರವದಿಂದ ತಮ್ಮ ಪುತ್ರಿಗೆ ಅದೇ ಹೆಸರು ಇಟ್ಟಿದ್ದರು.

ಆದರೆ ರಾಜಕೀಯ ಎಂಬುದು ಜೀವನದಂತೆಯೇ — ಯಾವಾಗ ತಿರುವು ಪಡೆಯುವುದು ಎಂಬುದು ಯಾರಿಗೂ ಗೊತ್ತಿಲ್ಲ!

ಮದುವೆ ತಿರುಗಿಸಿದ ರಾಜಕೀಯ ದಿಕ್ಕು!

ಮದುವೆಯ ನಂತರ ಸೋನಿಯಾ ಗಾಂಧಿಯ ರಾಜಕೀಯ ಪಯಣ ಸಂಪೂರ್ಣವಾಗಿ ದಿಕ್ಕು ಬದಲಿಸಿತು. ಅವರ ಪತಿ ಸುಭಾಷ್ ಸಕ್ರಿಯ ಬಿಜೆಪಿ ಕಾರ್ಯಕರ್ತರಾಗಿದ್ದು, ಪ್ರಸ್ತುತ ಪಂಚಾಯತ್ ಪ್ರಧಾನ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಪತಿಯ ರಾಜಕೀಯ ಚಟುವಟಿಕೆಗಳು, ಕುಟುಂಬದ ವಾತಾವರಣ ಮತ್ತು ಕಾರ್ಯಕರ್ತರ ಒತ್ತಾಯ — ಈ ಎಲ್ಲವು ಸೋನಿಯಾ ಅವರನ್ನು ಬಿಜೆಪಿಯತ್ತ ಕರೆದೊಯ್ದವು.

ಇಂದು ಅದೇ ಸೋನಿಯಾ ಗಾಂಧಿ, ಕಾಂಗ್ರೆಸ್ ಅಭ್ಯರ್ಥಿ ಮಂಜುಳಾ ರಮೇಶ್ ವಿರುದ್ಧ ಬಿಜೆಪಿ ಟಿಕೆಟ್‌ನೊಂದಿಗೆ ಸಜ್ಜಾಗಿ ನಿಂತಿದ್ದಾರೆ!