ಬಿಗ್ ಟಿಕೆಟ್ ಸರಣಿ 283 ನೇರ ಡ್ರಾದಲ್ಲಿ ಕರ್ನಾಟಕ ಮೂಲದ ಯುವಕನಿಗೆ ಒಲಿದ ಅದೃಷ್ಟ : ಈ ಮೊದಲು ಸುಳ್ಯ ಜಟ್ಟಿಪಳ್ಳದ ಯುವಕನಿಗೆ ಒಲಿದಿತ್ತು ಅದೃಷ್ಟ
ದುಬೈ, ಮಂಗಳವಾರ:
ಯುಎಇಯ ಪ್ರಸಿದ್ಧ ಬಿಗ್ ಟಿಕೆಟ್ ಸರಣಿ 283ರ ನೇರ ಡ್ರಾದಲ್ಲಿ 20 ಮಿಲಿಯನ್ ದಿರ್ಹಮ್ಗಳ ಭಾರೀ ಬಹುಮಾನ ಗೆದ್ದು ಭಾರತೀಯ ಪ್ರಜೆಯೊಬ್ಬರು ಹೊಸ ಮಲ್ಟಿ ಮಿಲಿಯನೇರ್ ಆಗಿದ್ದಾರೆ.
ವಿಜೇತರಾಗಿ ಆಯ್ಕೆಯಾದವರು ಒಮಾನ್ನಲ್ಲಿ ವಾಸಿಸುತ್ತಿರುವ ಭಾರತೀಯ ಪ್ರಜೆ ಶಾಂತನು ಶೆಟ್ಟಿಗಾರ್. ಅಬುಧಾಬಿಯಲ್ಲಿ ನಡೆದ ನೇರ ಡ್ರಾ ಕಾರ್ಯಕ್ರಮದಲ್ಲಿ ಘೋಷಿಸಲಾದ 305810 ಸಂಖ್ಯೆಯ ಟಿಕೆಟ್ ಅವರದ್ದಾಗಿತ್ತು.
ಕಳೆದ ಎಂಟು ವರ್ಷಗಳಿಂದ ಒಮಾನ್ನಲ್ಲಿ ವಾಸಿಸುತ್ತಿರುವ ಕರ್ನಾಟಕ ಮೂಲದ 33 ವರ್ಷದ ಶಾಂತನು, ವೃತ್ತಿಯಿಂದ ಅಂಗಡಿಯ ಉಸ್ತುವಾರಿ ನಡೆಸುತ್ತಿದ್ದಾರೆ. ತಮ್ಮ ಗೆಲುವಿನ ಕ್ಷಣವನ್ನು ನೆನಪಿಸಿಕೊಂಡ ಅವರು, “ಇದು ನನಗೆ ಸಂಪೂರ್ಣ ಅಚ್ಚರಿ ತಂದಿತು” ಎಂದು ಹೇಳಿದರು.
“ಸಾಮಾನ್ಯವಾಗಿ ನನಗೆ ಅನೇಕ ಸ್ಪ್ಯಾಮ್ ಕರೆಗಳು ಬರುತ್ತಿರುತ್ತವೆ. ಕೆಲಸದಲ್ಲಿ ತುಂಬಾ ತೊಡಗಿಸಿಕೊಂಡಿದ್ದೆ. ಇಂದು ರಾತ್ರಿ ಡ್ರಾ ಇದೆ ಎಂಬುದು ಗೊತ್ತಿತ್ತು, ಆದರೆ ನನ್ನ ಹೆಸರೇ ಘೋಷಣೆಯಾಗುತ್ತದೆ ಎಂದು ಕನಸಲ್ಲೂ ಯೋಚಿಸಿರಲಿಲ್ಲ. ನಿಜವಾಗಿಯೂ ನಾನು ಗೆದ್ದಿದ್ದೇನೆ ಎಂಬುದು ತಿಳಿದಾಗ ಕೆಲಕಾಲ ಮಾತೇ ಬರಲಿಲ್ಲ. ಇನ್ನೂ ಸಂಪೂರ್ಣವಾಗಿ ಅರಗಿಸಿಕೊಳ್ಳಲಾಗಿಲ್ಲ, ಆದರೆ ತುಂಬಾ ಸಂತೋಷವಾಗಿದೆ,” ಎಂದು ಅವರು ಹರ್ಷ ವ್ಯಕ್ತಪಡಿಸಿದರು.
ಮುಂದಿನ ಯೋಜನೆಗಳ ಕುರಿತು ಮಾತನಾಡಿದ ಶಾಂತನು, “ಟಿಕೆಟ್ ಅನ್ನು ಸ್ನೇಹಿತನೊಂದಿಗೆ ಸೇರಿ ಖರೀದಿಸಿದ್ದರಿಂದ, ಬಹುಮಾನವನ್ನು ಹಂಚಿಕೊಳ್ಳುತ್ತೇವೆ. ನನ್ನ ಪಾಲಿನ ಹಣದ ಕುರಿತು ಯಾವುದೇ ತೀರ್ಮಾನ ಕೈಗೊಳ್ಳುವ ಮೊದಲು ಸ್ವಲ್ಪ ಸಮಯ ತೆಗೆದುಕೊಂಡು ಯೋಚಿಸಲು ಬಯಸುತ್ತೇನೆ,” ಎಂದರು.
ಅದೇ ವೇಳೆ, ಬಿಗ್ ಟಿಕೆಟ್ನಲ್ಲಿ ಭಾಗವಹಿಸುವ ಕುರಿತು ಇತರರಿಗೂ ಸಂದೇಶ ನೀಡಿದ ಅವರು, “ಕುಟುಂಬದವರೊ ಅಥವಾ ಸ್ನೇಹಿತರೊ ಜೊತೆ ಸೇರಿ ಬಿಗ್ ಟಿಕೆಟ್ನಲ್ಲಿ ಭಾಗವಹಿಸಲು ನಾನು ಖಂಡಿತ ಪ್ರೋತ್ಸಾಹಿಸುತ್ತೇನೆ. ನಿಮ್ಮ ಅದೃಷ್ಟದ ಕ್ಷಣ ಯಾವಾಗ ಬರುತ್ತದೆ ಎಂದು ಯಾರಿಗೂ ಗೊತ್ತಿಲ್ಲ,” ಎಂದು ಹೇಳಿದರು.
