ತಮಿಳುನಾಡಿನ ಕರೂರ್ ಜಿಲ್ಲೆಯಲ್ಲಿ ಹೃದಯ ವಿದ್ರಾವಕ ಘಟನೆಯೊಂದು ನಡೆದಿದೆ. ಮನೆಯ ಬಳಿ ಕವರ್ ಹಾಕಿ ನಿಲ್ಲಿಸಿದ್ದ ಕಾರಿಗೆ ಬಾಲಕನೊಬ್ಬ ಏರಿ ಆಟವಾಡಿದ್ದಾನೆ. ಈ ವೇಳೆ ಆಕಸ್ಮಿಕವಾಗಿ ಕಾರಿನ ಬಾಗಿಲು ಮುಚ್ಚಿಕೊಂಡ ಪರಿಣಾಮ ಸಿಲುಕಿಕೊಂಡ ಬಾಲಕ ಉಸಿರುಗಟ್ಟಿ ಮೃತಪಟ್ಟ ಘಟನೆ ಆ ಪ್ರದೇಶದಲ್ಲಿ ತೀವ್ರ ಸಂಕಟ ಮೂಡಿಸಿದೆ.
ಕರೂರ್ ಜಿಲ್ಲೆಯ ಕುಳಿತಲೈ ಬಳಿಯ ಕಳುಗೂರ್ ಗ್ರಾಮದಲ್ಲಿ ಈ ಘಟನೆ ನಡೆದಿದೆ. ಮೃತ ಬಾಲಕ ಸಂಜೀವಿ (4) ಎಂದು ಗುರುತಿಸಲಾಗಿದೆ. ಬಾಲಕನ ತಂದೆ ವೇಲು (36), ತಾಯಿ ಮಾರಿಸ್ವರಿ (30). ದಂಪತಿಗಳು ಕೂಲಿ ಕೆಲಸಗಾರರಾಗಿದ್ದಾರೆ.
ನಿನ್ನೆ ಮಧ್ಯಾಹ್ನ ಸಂಜೀವಿ ಗ್ರಾಮದ ಇತರ ಮಕ್ಕಳೊಂದಿಗೆ ಆಟವಾಡುತ್ತಿದ್ದ. ಆ ಸಂದರ್ಭದಲ್ಲಿ ಮನೆಯ ಬಳಿಯೇ ಕವರ್ (ಉರೈ) ಹಾಕಿ ಮುಚ್ಚಿ ನಿಲ್ಲಿಸಿದ್ದ ಕಾರಿಗೆ ಹತ್ತಿ ಆಟ ಆಡಲು ಹೋಗಿದ್ದಾನೆ. ದುರಾದೃಷ್ಟವಶಾತ್, ಕಾರಿನ ಬಾಗಿಲು ತಾನಾಗಿಯೇ ಮುಚ್ಚಿಕೊಂಡಿತು. ಒಳಗಿನಿಂದ ತೆರೆಯಲು ಸಾಧ್ಯವಾಗದೆ ಬಾಲಕ ಸಂಜೀವಿ ಕಾರಿನೊಳಗೆ ಸಿಲುಕಿಕೊಂಡ. ಸ್ವಲ್ಪ ಹೊತ್ತಿನಲ್ಲೇ ಆಮ್ಲಜನಕದ ಕೊರತೆಯಿಂದ ಅವನು ಪ್ರಜ್ಞೆ ಕಳೆದುಕೊಂಡನು.
ಆಟಕ್ಕೆಂದು ಹೋದ ಮಗು ಬಹುಹೊತ್ತಿನವರೆಗೂ ವಾಪಸಾಗದಿದ್ದಾಗ ಪೋಷಕರು ಆತಂಕಗೊಂಡರು. ಸಂಬಂಧಿಕರು ಮತ್ತು ನೆರೆಹೊರೆಯವರು ಬಾಲಕನಿಗಾಗಿ ಹುಡುಕಾಟ ನಡೆಸಿದರು. ಅಂತಿಮವಾಗಿ ಅನುಮಾನದ ಆಧಾರದ ಮೇಲೆ ಮನೆಯ ಬಳಿಯ ಕಾರಿನ ಕವರ್ ತೆಗೆದು, ಗಾಜಿನ ಮೂಲಕ ಒಳಗೆ ನೋಡಿದಾಗ, ಸಂಜೀವಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಕಾರಿನೊಳಗೆ ಬಿದ್ದಿದ್ದು ಕಂಡುಬಂದಿತು.
ತಕ್ಷಣ ಕಾರಿನ ಬಾಗಿಲು ತೆರೆದು ಬಾಲಕನನ್ನು ಹೊರತೆಗೆದ ಪೋಷಕರು, ಅವನನ್ನು ಕುಳಿತಲೈ ಸರ್ಕಾರಿ ಜಿಲ್ಲಾ ಮುಖ್ಯ ಆಸ್ಪತ್ರೆಗೆ ದಾಖಲಿಸಿದರು. ವೈದ್ಯರು ತಪಾಸಣೆ ನಡೆಸಿ, ಸಂಜೀವಿ ಆಸ್ಪತ್ರೆಗೆ ದಾಖಲಿಸುವ ಮೊದಲೇ ಮೃತಪಟ್ಟಿರುವುದಾಗಿ ತಿಳಿಸಿದರು. ಆಸ್ಪತ್ರೆಯಲ್ಲಿ ಬಾಲಕನ ಪೋಷಕರು, ಸಂಬಂಧಿಕರು ಮತ್ತು ಗ್ರಾಮಸ್ಥರು ಗೋಳಾಡಿ ರೋದಿಸಿದಸಿದರು.
ಈ ಕುರಿತು ತೊಗೈಮಲೈ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಪೊಲೀಸರು ಮೃತ ಬಾಲಕನ ಶವವನ್ನು ವಶಕ್ಕೆ ಪಡೆದು, ಶವಪರೀಕ್ಷೆಗೆ ಆಸ್ಪತ್ರೆಗೆ ರವಾನಿಸಿದ್ದಾರೆ. ಹೆಚ್ಚಿನ ತನಿಖೆ ನಡೆಯುತ್ತಿದೆ.
m
