ಸುಳ್ಯ: ಪೈಚಾರು–ಕುಂಬ್ರಚೋಡ್‌ನಲ್ಲಿ ನಾಲ್ಕು ದಿನಗಳಿಂದ ವಿದ್ಯುತ್ ಇಲ್ಲದೆ ಜನರು ಕಂಗಾಲು!

ತುಕ್ಕು ಹಿಡಿದ ವಿದ್ಯುತ್ ಪ್ರಸರಣ ತಂತಿಗಳು, ತುಂಡಾಗಿ ನೆಲಕ್ಕುರುಳುವ ಇನ್ನಷ್ಟು ತಂತಿಗಳು! ತಂತಿಗಳೇ ಇಲ್ಲದೆ ವಿದ್ಯುತ್ ಪ್ರಸರಣ ಹೇಗೆ!?

ಸುಳ್ಯ ತಾಲೂಕಿನ ಪೈಚಾರು–ಕುಂಬ್ರಚೋಡ್ ಪ್ರದೇಶದಲ್ಲಿ ಕಳೆದ ನಾಲ್ಕು ದಿನಗಳಿಂದ ನಿರಂತರ ವಿದ್ಯುತ್ ವ್ಯತ್ಯಯ ಉಂಟಾಗಿ, ಸ್ಥಳೀಯ ನಿವಾಸಿಗಳು ತೀವ್ರ ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ವಿಶೇಷವಾಗಿ ಈ ತೀವ್ರ ಬೇಸಿಗೆ ಸಂದರ್ಭದಲ್ಲಿ ವಿದ್ಯುತ್ ಕೊರತೆ ಜನಜೀವನವನ್ನು ಅಸ್ತವ್ಯಸ್ತಗೊಳಿಸಿದೆ.
ವಿದ್ಯುತ್ ಇಲ್ಲದೆ ಕುಡಿಯುವ ನೀರಿನ ಪೂರೈಕೆ, ಗೃಹ ಬಳಕೆ ಸಾಧನಗಳು, ವ್ಯಾಪಾರ ಚಟುವಟಿಕೆಗಳು ಸೇರಿದಂತೆ ದೈನಂದಿನ ಜೀವನದ ಅನೇಕ ಅಂಶಗಳು ಪರಿಣಾಮಗೊಂಡಿವೆ. ರಾತ್ರಿ ವೇಳೆಯಲ್ಲಿ ಕತ್ತಲಿನಲ್ಲಿ ಕಳೆಯಬೇಕಾದ ಪರಿಸ್ಥಿತಿ ಉಂಟಾಗಿ, ಮಕ್ಕಳು ಮತ್ತು ವೃದ್ಧರು ಹೆಚ್ಚು ತೊಂದರೆ ಅನುಭವಿಸುತ್ತಿದ್ದಾರೆ. ಈ ಸಮಸ್ಯೆ ಹೆಚ್ಚಾಗಿ ಕುಂಬ್ರಚೋಡ್ ಪ್ರದೇಶದಲ್ಲಿ ‌ನಿರಂತರವಾಗಿ ಕಾಡುತ್ತಿದೆ ಸ್ಥಳೀಯರ ಪ್ರಕಾರ, ಈ ಸಮಸ್ಯೆಗೆ ಪ್ರಮುಖ ಕಾರಣವಾಗಿ ಹಳೆಯ ವಿದ್ಯುತ್ ಪ್ರಸರಣ ತಂತಿಗಳು ಹೊರಹೊಮ್ಮಿವೆ. ಹಲವು ವರ್ಷಗಳ ಹಿಂದೆ ಅಳವಡಿಸಲಾದ ತಂತಿಗಳು ಈಗ ತುಕ್ಕು ಹಿಡಿದು ದುರ್ಬಲಗೊಂಡಿದ್ದು, ಕೆಲವು ಕಡೆ ತುಂಡಾಗುವ ಹಂತಕ್ಕೆ ತಲುಪಿವೆ. ಇನ್ನೂ ಕೆಲವೆಡೆ ತಂತಿಗಳು ತುಂಡಾಗಿ ನೆಲದತ್ತ ಜಾರಿಕೊಂಡು ಅಪಾಯಕರ ಸ್ಥಿತಿಯಲ್ಲಿ ಕಾಣಿಸುತ್ತಿವೆ. ಇದರ ಪರಿಣಾಮವಾಗಿ ಸ್ವಲ್ಪ ಮಳೆ ಅಥವಾ ಗಾಳಿ ಬೀಸಿದರೂ ವಿದ್ಯುತ್ ಸರಬರಾಜು ತಕ್ಷಣ ವ್ಯತ್ಯಯಗೊಳ್ಳುತ್ತಿದೆ. ವಿದ್ಯುತ್ ತಂತಿಗಳ ಅಸ್ಥಿರತೆ ಹೆಚ್ಚುತ್ತಿರುವುದರಿಂದ ಸಾರ್ವಜನಿಕ ಸುರಕ್ಷತೆಗೆ ಸಹ ಅಪಾಯ ಉಂಟಾಗಿದೆ ಎಂದು ಸ್ಥಳೀಯರು ಆತಂಕ ವ್ಯಕ್ತಪಡಿಸಿದ್ದಾರೆ. ಈ ಕುರಿತು ಸಂಬಂಧಿತ ಅಧಿಕಾರಿಗಳಿಗೆ ಹಲವು ಬಾರಿ ಮನವಿ ಸಲ್ಲಿಸಿದ್ದರೂ ಈಗಾ ಮತ್ತೊಮ್ಮೆ ಕುಂಬ್ರಚೊಡ್ ನಿವಾಸಿಗಳು ಮೆಸ್ಕಾಮ್ ಅಧಿಕಾರಿಗಳಿಗೆ ಸಮಸ್ಯೆ ಪರಿಹಾರ ಮಾಡುವ ನಿಟ್ಟಿನಲ್ಲಿ ಮನವಿ ಸಲ್ಲಿಸಿದ್ದಾರೆ,  ತುರ್ತುಗತಿಯಲ್ಲಿ ಹಳೆಯ ತಂತಿಗಳನ್ನು ಬದಲಿಸಿ, ನೂತನ ಹಾಗೂ ಸುರಕ್ಷಿತ ವಿದ್ಯುತ್ ವ್ಯವಸ್ಥೆಯನ್ನು ಕಲ್ಪಿಸಬೇಕು ಎಂದು ಅವರು ಆಗ್ರಹಿಸಿದ್ದಾರೆ. ಮೆಸ್ಕಾಮ್ ಅಧಿಕಾರಿಗಳಿಗೆ ಮನವಿ ನೀಡುವ ಸಂದರ್ಭದಲ್ಲಿ ಸ್ಥಳೀಯರಾದ ಆಲಿ ಪೆರಾಜೆ,ಅಬ್ದುಲ್ ಗಫ್ಫಾರ್,ಹನೀಫ್,ಸಂಸುದ್ದೀನ್,ಇಬ್ರಾಹಿಂ,ಸಿರಾಜ್,ಅಬ್ದುಲ್ ಕರೀಂ,ಮೊಹಿದೀನ್ ಉಪಸ್ಥಿತರಿದ್ದರು ಒಟ್ಟಿನಲ್ಲಿ, ಕುಂಬ್ರಚೋಡ್ ಪ್ರದೇಶದಲ್ಲಿ ನಿರಂತರವಾಗಿ ಎದುರಾಗುತ್ತಿರುವ ವಿದ್ಯುತ್ ಸಮಸ್ಯೆ ಜನಜೀವನಕ್ಕೆ ತೀವ್ರ ತೊಂದರೆ ಉಂಟುಮಾಡಿದ್ದು, ತಕ್ಷಣದ ಶಾಶ್ವತ ಪರಿಹಾರಕ್ಕಾಗಿ ಅಧಿಕಾರಿಗಳು ಸ್ಪಂದಿಸಬೇಕಿದೆ ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.