ವಾಷಿಂಗ್ಟನ್, ಜೂನ್ 21: ಜಿ7 ಶೃಂಗಸಭೆಯನ್ನು ಸುತ್ತುವರೆದ ರಾಜತಾಂತ್ರಿಕ ತಕರಾರು ಇದೀಗ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ನಡುವೆ ವಾಕ್ಸಮರಕ್ಕೆ ಕಾರಣವಾಗಿದೆ. ಟ್ರಂಪ್ ಮಾಡಿದ ಟೀಕೆಗೆ ಮೆಲೋನಿ ಕಟುವಾಗಿ ಪ್ರತಿಕ್ರಿಯಿಸಿ, “ನನ್ನ ಪ್ರಭಾವದ ಬಗ್ಗೆ ನೀವು ಚಿಂತಿಸಬೇಕಾಗಿಲ್ಲ” ಎಂದು ಹೇಳಿದ್ದಾರೆ.
ಇತ್ತೀಚೆಗೆ ಫ್ರಾನ್ಸ್ನಲ್ಲಿ ನಡೆದ ಜಿ7 ಶೃಂಗಸಭೆಯ ವೇಳೆ, ಮೆಲೋನಿ ತಮ್ಮೊಂದಿಗೆ ಫೋಟೋ ತೆಗೆಸಿಕೊಳ್ಳಲು ಪದೇಪದೇ ಕೇಳಿಕೊಂಡಿದ್ದರು ಮತ್ತು ಇಟಲಿಯಲ್ಲಿ ಕುಸಿಯುತ್ತಿರುವ ತಮ್ಮ ರಾಜಕೀಯ ಪ್ರಭಾವವನ್ನು ಹೆಚ್ಚಿಸಿಕೊಳ್ಳಲು ಅವರು ಹೀಗೆ ನಡೆದುಕೊಂಡರು ಎಂದು ಟ್ರಂಪ್ ಆರೋಪಿಸಿದ್ದರು.
ಇದಕ್ಕೆ ತಕ್ಷಣ ಪ್ರತಿಕ್ರಿಯಿಸಿದ ಮೆಲೋನಿ, ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ, “ಅಧ್ಯಕ್ಷ ಟ್ರಂಪ್, ನಿಮ್ಮ ಅಪ್ರಚೋದಿತ ದಾಳಿಗಳು ಸಂಪೂರ್ಣ ಅರ್ಥಹೀನ. ನೀವು ನನ್ನ ಪ್ರಭಾವದ ಬಗ್ಗೆ ಚಿಂತಿಸಬೇಕಾಗಿಲ್ಲ; ಮೊದಲು ನಿಮ್ಮದೇ ಪ್ರಭಾವದ ಮೇಲೆ ಗಮನಹರಿಸಿ” ಎಂದು ತಿರುಗೇಟು ನೀಡಿದರು.
ಇದಕ್ಕೂ ಮೊದಲು, ಟ್ರಂಪ್ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ, “ಜಿ7 ಶೃಂಗಸಭೆಯಲ್ಲಿ ಮೆಲೋನಿ ನನ್ನೊಂದಿಗೆ ಫೋಟೋಗೆ ಕೇಳುತ್ತಲೇ ಇದ್ದರು. ಇರಾನ್ ಪರಮಾಣು ಶಸ್ತ್ರಾಸ್ತ್ರ ಅಭಿವೃದ್ಧಿಯನ್ನು ತಡೆಯುವ ಅಮೆರಿಕದ ಪ್ರಯತ್ನಕ್ಕೆ ಬೆಂಬಲ ನೀಡದ ಕಾರಣ ಇಟಲಿಯಲ್ಲಿ ಅವರ ಪ್ರಭಾವ ಕುಸಿದಿದೆ” ಎಂದು ಬರೆದಿದ್ದರು. ಜೊತೆಗೆ, ಯುದ್ಧದ ಸಂದರ್ಭದಲ್ಲಿಯೂ ಇಟಲಿ ಅಮೆರಿಕದ ಮಿಲಿಟರಿ ವಿಮಾನಗಳಿಗೆ ತನ್ನ ರನ್ವೇಗಳನ್ನು ಬಳಸಲು ಅನುಮತಿ ನೀಡಲಿಲ್ಲ ಎಂಬ ಆರೋಪವನ್ನೂ ಮಾಡಿದ್ದಾರೆ.
ಟ್ರಂಪ್ ಆರೋಪಗಳನ್ನು ಸಂಪೂರ್ಣ ತಿರಸ್ಕರಿಸಿದ ಮೆಲೋನಿ, “ನಿಮ್ಮ ಸ್ನೇಹಿತನಾಗಿರುವುದು ನನ್ನ ಪ್ರಭಾವವನ್ನು ಹೆಚ್ಚಿಸುವುದಿಲ್ಲ. ನನ್ನ ಪ್ರಭಾವ ಇಟಲಿಯ ರಾಷ್ಟ್ರೀಯ ಹಿತಾಸಕ್ತಿಗಳನ್ನು ರಕ್ಷಿಸುವುದರ ಮೇಲೆ ನಿಂತಿದೆ. ಯುಎಸ್ ಮಿಲಿಟರಿ ನೆಲೆಗಳ ಬಳಕೆ ದ್ವಿಪಕ್ಷೀಯ ಒಪ್ಪಂದಗಳ ಮೂಲಕವೇ ನಿರ್ಧಾರವಾಗುತ್ತದೆ. ನಾನು ಪ್ರಧಾನಿಯಾಗಿರುವವರೆಗೆ ಅವುಗಳನ್ನು ಉಲ್ಲಂಘಿಸುವ ಪ್ರಶ್ನೆಯೇ ಇಲ್ಲ” ಎಂದು ಸ್ಪಷ್ಟಪಡಿಸಿದರು.
ಈ ವಾಕ್ಸಮರ ಅಂತಾರಾಷ್ಟ್ರೀಯ ರಾಜಕೀಯ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದ್ದು, ಎರಡೂ ನಾಯಕರ ನಡುವಿನ ಭಿನ್ನಾಭಿಪ್ರಾಯಗಳು ಮತ್ತಷ್ಟು ಗಾಢವಾಗುವ ಸಾಧ್ಯತೆ ಇದೆ
m
