ಕೌಟುಂಬಿಕ ಕಲಹ: ಬಾಡಿಗೆ ಗುಂಡಾಗಳಿಂದ ಪತಿಯ ಕಾಲು ಮುರಿತ — ಪತ್ನಿ ಸೇರಿ ಮೂವರು ಬಂಧನ

ಕೌಟುಂಬಿಕ ಕಲಹ: ಬಾಡಿಗೆ ಗುಂಡಾಗಳಿಂದ ಪತಿಯ ಕಾಲು ಮುರಿತ — ಪತ್ನಿ ಸೇರಿ ಮೂವರು ಬಂಧನ.

ತಾಂಬರಂ, ಜೂನ್ 21: ಕೌಟುಂಬಿಕ ಕಲಹದ ಹಿನ್ನೆಲೆ ಬಾಡಿಗೆಗೆ ಗುಂಡಾಗಳನ್ನು ನೇಮಿಸಿ ಪತಿಯ ಮೇಲೆ ದಾಳಿ ನಡೆಸಿ ಕಾಲು ಮುರಿದ ಆರೋಪದ ಮೇಲೆ ಪತ್ನಿ ಸೇರಿದಂತೆ ಮೂವರನ್ನು ಪೊಲೀಸರು ಬಂಧಿಸಿರುವ ಘಟನೆ ತಾಂಬರಂ ಸಮೀಪದ ವೆಂಕಂಬಕ್ಕಂ ಪ್ರದೇಶದಲ್ಲಿ ಬೆಳಕಿಗೆ ಬಂದಿದೆ.

ಬಂಧಿತರನ್ನು ವಸಂತ, ರೌಡಿ ಪೊನ್ಮಣಿ ಹಾಗೂ ಭರತ್ ಎಂದು ಗುರುತಿಸಲಾಗಿದೆ. ಮತ್ತೊಬ್ಬ ಆರೋಪಿಯಾಗಿರುವ ಆಗಸ್ಟೀನ್ ಪರಾರಿಯಾಗುವ ವೇಳೆ ರಸ್ತೆ ಅಪಘಾತದಲ್ಲಿ ಗಾಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಪೊಲೀಸ್ ಮಾಹಿತಿ ಪ್ರಕಾರ, ದಾಮೋದರನ್ (40) ಮತ್ತು ವಸಂತ ದಂಪತಿ 12 ವರ್ಷಗಳ ಹಿಂದೆ ವಿವಾಹವಾಗಿದ್ದು, ಅವರಿಗೆ 11 ವರ್ಷದ ಮಗನಿದ್ದಾನೆ. ಕುಟುಂಬದಲ್ಲಿ ಉಂಟಾದ ಕಲಹದ ಕಾರಣ ವಸಂತ ಕೆಲವು ವರ್ಷಗಳ ಹಿಂದೆ ಪ್ರತ್ಯೇಕವಾಗಿ ವಾಸಿಸುತ್ತಿದ್ದಳು. ಇತ್ತೀಚೆಗೆ ಮಗನನ್ನು ತನ್ನೊಂದಿಗೆ ಕಳುಹಿಸುವಂತೆ ವಸಂತ ಕೇಳಿಕೊಂಡಿದ್ದರೂ, ದಾಮೋದರನ್ ನಿರಾಕರಿಸಿದ್ದಾನೆ ಎನ್ನಲಾಗಿದೆ.

ಇದರಿಂದ ಕೋಪಗೊಂಡ ವಸಂತ, ಪತಿಯ ಮೇಲೆ ಸೇಡು ತೀರಿಸಿಕೊಳ್ಳಲು ಸಂಚು ರೂಪಿಸಿದ್ದಾಳೆ ಎಂದು ತನಿಖೆಯಲ್ಲಿ ತಿಳಿದುಬಂದಿದೆ. ಕಳೆದ ಏಪ್ರಿಲ್‌ನಲ್ಲಿ, ‘ಪಾರ್ಸೆಲ್ ತಲುಪಿಸಲು ಬಂದಿದ್ದೇವೆ’ ಎಂದು ಹೇಳಿಕೊಂಡು ದಾಮೋದರನ್ ಮನೆಗೆ ಬಂದ ದುಷ್ಕರ್ಮಿಗಳು, ಕಬ್ಬಿಣದ ಪೈಪ್‌ನಿಂದ ಹಲ್ಲೆ ನಡೆಸಿ ಅವರ ಬಲಗಾಲನ್ನು ಮುರಿದಿದ್ದಾರೆ. ಮಧ್ಯೆ ತಡೆಗಟ್ಟಲು ಬಂದ ದಾಮೋದರನ್ ಅವರ ವೃದ್ಧ ತಾಯಿಯನ್ನೂ ತಳ್ಳಿಹಾಕಿ ಹಲ್ಲೆ ನಡೆಸಲಾಗಿದೆ.

ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡ ಪೊಲೀಸರು, ಬೈಕ್ ನೋಂದಣಿ ಸಂಖ್ಯೆಗಳ ಆಧಾರದಲ್ಲಿ ಆರೋಪಿಗಳನ್ನು ಪತ್ತೆಹಚ್ಚಿದ್ದಾರೆ. ದಾಳಿಯನ್ನು ರೌಡಿ ಪೊನ್ಮಣಿ ಸಂಚಾಲಿಸಿದ್ದರೆಂದು ತಿಳಿದುಬಂದಿದ್ದು, ವಸಂತ ತನ್ನ ಪತಿಯ ಜೀವಕ್ಕೆ ಅಪಾಯ ಉಂಟಾಗದಂತೆ ಕೇವಲ ಕಾಲು ಮುರಿಯಲು ₹4 ಲಕ್ಷಕ್ಕೆ ಒಪ್ಪಂದ ಮಾಡಿಕೊಂಡು, ₹3.50 ಲಕ್ಷ ಮುಂಗಡವಾಗಿ ನೀಡಿದ್ದಾಳೆ ಎಂಬುದು ತನಿಖೆಯಲ್ಲಿ ಬಹಿರಂಗವಾಗಿದೆ.

ಬಂಧಿತರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿ ಜೈಲಿಗೆ ಕಳುಹಿಸಲಾಗಿದೆ. ಚಿಕಿತ್ಸೆ ಪಡೆಯುತ್ತಿರುವ ಆಗಸ್ಟೀನ್ ಗುಣಮುಖನಾದ ನಂತರ ಅವನನ್ನೂ ಬಂಧಿಸುವುದಾಗಿ ಪೊಲೀಸರು ತಿಳಿಸಿದ್ದಾರೆ.