ನವದೆಹಲಿ: ಭಾರತದಲ್ಲಿರುವ ಇರಾನ್ನ ಸರ್ವೋಚ್ಚ ನಾಯಕ ಅಬ್ದುಲ್ ಮಜೀದ್ ಹಕೀಮ್ ಇಲಾಹಿ ಅವರ ಪ್ರತಿನಿಧಿ ಶುಕ್ರವಾರ ಮಹತ್ವದ ಹೇಳಿಕೆ ನೀಡಿದ್ದು, ಪ್ರಸ್ತುತ ಪ್ರದೇಶದಲ್ಲಿ ನಡೆಯುತ್ತಿರುವ ಸಂಘರ್ಷದ ಕುರಿತು ಸ್ಪಷ್ಟನೆ ನೀಡಿದ್ದಾರೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ಅಮೆರಿಕ ಮತ್ತು ಇಸ್ರೇಲ್ ಮಾತುಕತೆಗಳ ಬಗ್ಗೆ ಗಂಭೀರತೆಯನ್ನು ತೋರಿಸುತ್ತಿಲ್ಲ ಎಂದು ಆರೋಪಿಸಿದರು. ಇದೇ ವೇಳೆ, “ಈ ಯುದ್ಧವನ್ನು ಇರಾನ್ ಆರಂಭಿಸಲಿಲ್ಲ. ಇರಾನ್ ಯಾವುದೇ ರೀತಿಯ ಸಂಘರ್ಷವನ್ನು ಬಯಸುವುದಿಲ್ಲ” ಎಂದು ಅವರು ತಿಳಿಸಿದ್ದಾರೆ.
ಪ್ರದೇಶದಲ್ಲಿ ಶಾಂತಿ ಮತ್ತು ಸ್ಥಿರತೆ ಅಗತ್ಯವಿದೆ ಎಂದು ಒತ್ತಿ ಹೇಳಿದ ಅವರು, ವಿಶೇಷವಾಗಿ ಹಾರ್ಮುಜ್ ಜಲಸಂಧಿಯಲ್ಲಿ ನಡೆಯುವ ಯುದ್ಧದಿಂದ ವಿಶ್ವದ ಅನೇಕ ದೇಶಗಳು ಸಂಕಷ್ಟಕ್ಕೆ ಒಳಗಾಗುತ್ತಿವೆ ಎಂದು ಹೇಳಿದರು. ಯುದ್ಧದಿಂದ ಮುಗ್ಧ ಜನರು ಹಾನಿಗೊಳಗಾಗುತ್ತಿದ್ದಾರೆ ಮತ್ತು ಅನಿಲ, ತೈಲ ಸೇರಿದಂತೆ ಪ್ರಮುಖ ಸರಕುಗಳ ಬೆಲೆ ಏರಿಕೆಯಿಂದ ಜಾಗತಿಕ ಮಟ್ಟದಲ್ಲಿ ಪರಿಣಾಮ ಉಂಟಾಗಿದೆ ಎಂದು ಅವರು ವಿವರಿಸಿದರು.
ಇರಾನ್ ಶಾಂತಿ, ನ್ಯಾಯ ಮತ್ತು ಮಾನವೀಯತೆಗೆ ಬದ್ಧವಾಗಿದೆ ಎಂದು ಹೇಳಿದ ಪ್ರತಿನಿಧಿ, ಪರಿಸ್ಥಿತಿ ಮತ್ತಷ್ಟು ಹದಗೆಡದಂತೆ ತಡೆಯಲು ಜಾಗತಿಕ ನಾಯಕರ ಸಹಕಾರ ಅಗತ್ಯವಿದೆ ಎಂದು ಕರೆ ನೀಡಿದರು. “ವಿಶ್ವ ನಾಯಕರು ಒಗ್ಗೂಡಿ ಈ ಯುದ್ಧದ ಮುಂದುವರಿಕೆಯನ್ನು ತಡೆಯಬೇಕು” ಎಂದು ಅವರು ಮನವಿ ಮಾಡಿದರು.
ಇದರ ನಡುವೆ, ಇಸ್ರೇಲ್ ವಿರುದ್ಧ ಕಿಡಿಕಾರಿದ ಅವರು, “ಯಾವುದೇ ಬದ್ಧತೆಗಳನ್ನು ಪೂರೈಸದಿರುವುದು ಇಸ್ರೇಲ್ನ ಸ್ವಭಾವ” ಎಂದು ಆರೋಪಿಸಿದರು. ಅಮೆರಿಕ ಮಾತುಕತೆಗಳನ್ನು ಮುಂದುವರಿಸಲು ಬಯಸಿದರೆ ಅದಕ್ಕೆ ಅವಕಾಶವಿದೆ ಎಂದರೂ, “ಅದರಲ್ಲಿ ಯಾವುದೇ ನಂಬಿಕೆ ಇಲ್ಲ” ಎಂದು ಅವರು ಹೇಳಿದರು.
m
